فرشولي دوشك حزن بقلم الشاعرة امل الطعمة

 فرشولي دوشگ حزن 

وبلحاف هموم غطوني 

هلي حرگوني بجمر

وغطو على عيوني 

وبالنفط مو بالماي

ربعي اليطفوني 

ياعيني سال الدمع

ماوجع جفوني 

ماخوفي سيل الدمع

خوفي يجرحوني 

گولوله الشيب الطلع

بدّل سواد عيوني 

گولوله كل الحزن 

تمحي ضحكة سنوني 

اشتريتك يل بعتني

بسوگ الحرج باعوني 

بس صعبة نتلاگى بعد

لو خابت ظنوني 

غربة وصفت دنيتي

مدري المحبة فنوني 

هاي قسمتي ياهلي

ياناس لوموني 

لو راح مني العمر

يا احباب اذكروني