غرامك سحر بقلم الشاعر ياسر الشريف

 غرامك سِحر

          

و مش شايف لبَحرك بَر

و علي أرضك سَجين و أنا حُر

و حقي من زمان ضايع و منك شربت العذاب المُر 

و قلبي داب في حبك دوب عصرتيني في حضنك عَصر  

و كل ما أقول عن حبك اتوب قلبي يقول لي دي أمك مصر

و كل أما أقدم لك خير تقابليني ليه بصَد و هَجر؟

و آديني صابر علي المكتوب و رب الكون وَهبنى الصبر

و مستني في يوم تِرقي و تِحني أو أرحل و أسكن قَبر

و كله يهون فِدا ترابك ما أنا حارسِك و بوابِك 

واقف زِينهار علي بابك و معايا هنا وِلادك الشُداد السُمر

حالفين يكونوا في ركابك لحد ما يطلع لليلك فَجر

يا بهية يا صبية يا عفية يا أرض الجمال و السِحر

ما أنا العاشق فى محرابك و ف غرامك بكتب شِعر

✨️

د.ياسر الشريف